Pages

ادعمنا على اليوتيوب

وظائف خالية

كتب بواسطة : Unknown on الأحد | 7:44 م


بواسطه "مجموعة وظائف خالية للمهندسين"
وظاءف خالية



بلاش احباط

فى كام نقطة احب اوضحهم بناء على اللى شوفته بيحصل.
انا شغال حاليا فى جمعية الاورمان و بنك مصر وقلت انقلكم اللى بشوفه بعينى فى موضوع التعيين و الوظايف المطلوبة..

جمعية الاورمان كانت نزلت اعلان عن طلب مبرمجين كمبيوتر و كنت ماسك الموضوع ده و المفروض انى اشوف السى في هات واقيم الناس..

بعد حوالى اسبوعين بشوف الميل لاقيت فيه حوالى 130 سى فى فدخلت على اول واحد لاقيته مهندس ميكانيكا فريش..
طب مقدم ليه فى الوظيفة دى ؟ استخسار ؟ مبدا مش هخسر حاجة ؟
طب سيبك منه ديليت وخش على اللى بعدة.. واحده معندوش اى خبره خالص غير مدخل بيانات واحنا طالبين خبره فى البرمجة.. مقدم ليه ده كمان ؟ خير.. ديليت اللى بعده
واحد تانى مقدم انه يشتغل محاسب.. حد قالك اننا عايزين محاسبين ؟ سلامة نظرك يا باشا

وانا بقلب فى الصفحات شفت مهازل اكتر.. اللى باعت السى فى 10 مرات ورا بعض.. و اللى السى فى بتاعه كله على بعضه 10 سطور.. فالطبيعى كلمت اول سى فى ينفع و حتى لو مش الافضل و ضاعت الفرصه على واحد يستاهل الوظيفة بجد !

سئلت بتاع التعيينات فى بنك مصر ايميل البنك بتاع التوظيف عليه كام سى فى ؟ قالى 15 الف سى فى.. بقوله بجد ازاى ؟.. بيقولى الناس بتبعت و خلاص وطبعا مش بنقراهم كلهم

اكيد قول فى 10 الاف سى فى منهم مش مؤهلين اصلا للشغلانه ولا مستوفين الشروط..

عارفين نتيجة التصرفات دى ايه ؟ شركات كتير جدا معدتش بتنزل اعلانات و منهم بنك مصر..

فى بنك مصر مثلا بيبعتوا على ايميلات الموظفين كلهم انهم عايزين ناس.. و اللى يعرف حد يجيبه و خلاص.. لما الناس اللى تيجى بقى يبقى عددها غير كافى ساعتها بقى يعملوا اعلان.. طبعا احسن ما يقروا 15 الف سى فى..

قبل ما اعلان جمعية الاورمان ده ينزل فى الجرايد سئلونى تعرف حد نجيبه وخلاص ويبقى كويس قلتلهم لاء معرفش.. عشان كده نزلوا اعلان..

طيب بتعملوا كده ليه ؟ سيبوا فرصه للناس الى تستاهل تاخد حقهم فى الشغل و بلاش الاسلوب ده.. شايف نفسك مش مؤهل متقدمش فى الوظيفة وسيب فرصه لغيرك..

الخلاصه يعنى انا كلامى ده موجه لنوعين من الناس..
النوع الاولانى اللى بيبعت و خلاص بقوله لو انت مش مؤهل مش هنكلمك صدقنى فبلاش تبعت وتقرفنا على الفاضى ..

و النوع التانى اللى بيبعت و مؤهل ومحدش بيكلمه و ياخدوا ناس اقل منه ويقعد يقول لنفسه انا محدش كلمنى ليه.. انا بقوله مش معنى ان محدش كلمك انك وحش لا ابدا.. الموضوع و ما فيه ان السى فى بتاعك متقراش اصلا عشان العدد كبير جدا..
الصح انك متبعتش الوظيفة لاصحابك اللى معندهمش خبره وتقولهم ابعتوا وخلاص و تقول لنفسك كله بثوابه.. الصح صح و الغلط غلط !
ابعت السى فى و قول يا رب و بلاش يجيلك احباط او تحس انك قليل لو محدش كلمك..





مواضيع ذات صله

  1. كود 39 "تنمية ومعرفة"
  2. جدول للتفوق الدراسى (إهداء لك أيتها الأم).
  3. لا تدع طفلك يفوز دائما

0 التعليقات:

إرسال تعليق